Aktuelles und News

Südostschweiz: 19.08.2015 (La Quotidiana), Seite 3

Colligiaziun da tariffas e destinaziun communabla

La voluntad da cooperar dad Andermatt, Sedrun e Mustér para d’esser avon maun

Da Hans Huonder / anr

Il davos temps han differents discuors bilaterals concernent igl avegnir turistic sisum la Surselva ed Ursera giu liug. Sco quei che Franz Egle – il maun dretg da Samih Sawiris en Svizra – ha detg sin damonda dall’Agentura da Novitads Rumantscha, para il glatsch da luar. Duas finamiras vegnan avisadas: Ina organisaziun da turissem communabla ed ina colligiaziun da tariffas dallas pendicularas d’Andermatt, Sedrun e Mustér. Il matg ha la suprastonza communala da Tujetsch visau la collaboraziun cun Sedrun Mustér Turissem. Igl emprem ei quei succediu immediatamein sin la fin da matg, silsuenter ei ve-gniu communicau che la visada mondi en vigur la fin d’october, respectivamein la fin digl onn da fatschenta 2015/16 da Sedrun Mustér Turissem. Tujetsch da sia vart ha giu communicau che la vischnaunca vegli cooperar turisticamein igl avegnir oravontut cun Andematt. Quella decisiun ha procurau e procura aunc adina per malsegirtads. Negin che sa propi co ei duei ir vinavon il proxim temps en caussa turistica sisum la Surselva. En-tras quella decisiun vegnan rodund 48 milliuns francs da cantuns e confederaziun per investiziuns els territoris da skis dad Andermatt, Sedrun e Mustér periclitai. Quels flessegian sulettamein sch’ils treis loghens ein promts d’ademplir differentas pretensiuns, denter auter da cooperar en in destinaziun da turissem communabla.

Voluntad ei avon maun

En connex cun ina collaboraziun futura dils treis loghens gioga Andermatt ina rolla centrala. Ferton che Mustér e Sedrun coopereschan dapi 17 onns enteifer Sedrun Mustér Turissem, ei in collaboraziun cun Andermatt buca sedada ils davos onns. Ussa duei quei denton semidar. Franz Egle ch’ei aschidadir il maun dretg da Samih Sawiris en Svizra e che sesa en differents impurtonts gremis digl investur egipzian, sco era ella suprastonza dad Andermatt Ursera Turissem, emprova d’anflar ina soluziun cun tut ils partenaris: «Che Sedrun ed Andermatt collaboreschan igl avegnir ei logic. Quella cooperaziun sedat sin fundament dil territori da skis communabel. Suenter che la suprastonza communala da Tujetsch ha visau il contract cun Sedrun Mustér Turissem ei la damonda davart igl avegnir da Mustér setschentada. Davart la Andermatt Sedrun Sport SA beneventein nus claramein la colligiaziun d’ina pendiculara da Sedrun el territori da skis da Mustér e cheutras era ina destinaziun turistica ed ina vendita communabla dalla purschida dils treis loghens. Pli gronda che quella ei e pli ferma ch’ella ei sin la fiera.»

In’organisaziun communabla

Tenor Franz Egle ch’ei staus pli baul era cussegliader persunal da cusseglier federal Flavio Cotti, vegn ei luvrau il mument ton vid ina colligiaziun da tariffas dalla Andermatt Sedrun Sport SA cun las Pendicularas Mustér SA sco era vid la formaziun d’ina destinaziun turistica communabla dils treis loghens: «Quellas duas finamiras lein nus contonscher. Sche quei reussescha a nus, ha la destinaziun futura ina tut autra forza da sepresentar sin la fiera.» Sin fundament dils discuors marschai il davos temps ei Franz Egle perschuadius che las duas finamiras ein contonschiblas: «Jeu haiel l’impressiun che la voluntad da collaborar e d’anflar bunas soluziuns – concretamein la colligiaziun da tariffas e la formaziun d’ina suletta destinaziun – ei avon maun. Sin fundament da quei spért positiv sundel jeu optimists ch’ei reussescha da contonscher quels dus scops.» Tenor Franz Egle duess ei esser pusseivel d’anflar soluziuns concretas entochen la fin da quest onn: «Il mument lavuran tuts partenaris vid lur pretensiuns. En in proxim pass ha ei num s’avischinar, anflar cumpromiss e da concretisar la collaboraziun.» Ils discuors concernent ina cooperaziun futura marschan il mument oravontut sin plaun politic a Mustér e Tujetsch, sco era davart la Andermatt Sedrun Sport SA.

Colligiaziun da tariffas

Arisguard ina colligiaziun da tariffas vegn l’Andermatt Sedrun Sport SA a luvrar il proxim temps vid in model pusseivel ed allura a proponer quel allas Pendicularas Mustér SA. Igl acziunari principal da quellas ha gia signalisau differentas gadas ch’el seigi promts da discuorer davart ina tala colligiaziun da tariffas cun las pendicularas dad Andermatt e Sedrun. Essend che omisduas societads vegnan dominadas d’in acziunari principal, savess quei postulat gia daditg giavischau daventar bein spert realitad. Tgei fuorma giuridica che la destinaziun da turissem sco tala savess haver ei il mument aunc buca decidiu. Ella savess esser ina societad acziunara.


 

Zurück